ОТКРЫТЫЙ ТЕКСТ Электронное периодическое издание ОТКРЫТЫЙ ТЕКСТ Электронное периодическое издание ОТКРЫТЫЙ ТЕКСТ Электронное периодическое издание Сайт "Открытый текст" создан при финансовой поддержке Федерального агентства по печати и массовым коммуникациям РФ
Обновление материалов сайта

14 декабря 2017 г. опубликованы материалы: опись ГАНО, г. Арзамас. Ф. № 81 "Сиротский суд г. Ардатова Нижегородской губернии"; повестки дня заседаний бюро Горьковского горкома ВКП(б) за 1940 г.


   Главная страница  /  Текст истории  /  Археография

 Археография
Размер шрифта: распечатать





«Костромское житие» великого князя Юрия Всеволодовича (54.95 Kb)

 
Несколько лет тому назад петербургский исследователь А. В. Сиренов обнаружил так называемое «Костромское житие» великого князя Юрия Всеволодовича – героя легенды о граде Китеже. Для науки это не прошло незамеченным. Выяснилось, что для создателя Китежского летописца (литературной основы китежской легенды) «Костромское житие» являлось едва ли не главным источником вдохновения – заимствовались не только базовые элементы сюжета, но и словесные обороты.
«Костромское житие» публикуется на электронных страницах «Открытого текста» как третья часть серии материалов китежской тематики. «Бумажная» ипостась Жития увидела свет в 2003 году усилиями самого А. В. Сиренова. Казалось бы, нет ничего более естественного, как дать текст Жития в комментариях его первооткрывателя. Но по просьбе автора комментариев пока не будет: новые находки на ходу (пардон за каламбур!) меняют взгляд на возможное происхождение памятника.
Текст публикуется по изданию: Путь ко граду Китежу: князь Георгий Владимирский в истории, житиях, легендах / подготовка текстов и исслед. А. В. Сиренова. – СПб.: «Дмитрий Буланин», 2003. – С. 120–155.
Материал подготовил И. В. Нестеров
 
КОСТРОМСКОЕ  ЖИТИЕ
 
л.10 об.                       Месяца февруария в 4 день жития и страдания
святаго благоверного великого князя
Георьгия Всеволодича Владимерскаго
и всея Росии чюдотворца
 
Хотящу ми во имя Христово и пречистыя его Богоматере поведати житие угодника их сего святааго и благочестиваго князя Георгия Всеволодовича. Прежде подобает сказание сотворити о блаженных родителех его и о достоинстве их, к тому же мало воспомянути о богоспасаемом граде Въладимире, когда и како господоначалство киевское в он прииде. Начало же сотворим сице.
В лето 6633 месяца маиа в 19 день преставися в Киеве благоверный и великий князь Владимир Манамах всея России самодержец.
По смерти же его Российское царство нача разделятися на многая начала, первоначальство
л. 11    же // киевское ис честию преходити начинаше.
И камо сего великаго князя Владимира бяше сын великий князь Георгий Долгорукий. Той исьперва господъствуя в Суздале и в Ростове, потом в лето 6655 преселися во град Москву, обновляя в нем первоначальственное господъствование. Тамо убо живя и град Юрьев Польской заложи во свое имя, в нем же и церковь каменну постави во имя святаго великомученика Георгия. Потом преселися во град Киев, идеже ему господьствующу, принесен бысть к нему из Цряграда в Киев Пирогощею купцем чудотворный пречистый образ пресвятыя владычицы нашея Богородицы и приснодевы Марии, иже последи наречен бысть икона Владымир-
л. 11 об. ская, его же написа богогласный // апостол и благовестник Лука. И поставлен бысть той божественный образ в Вышеграде в монастыре девическом, идеже многая и преславная чудеса тем пречестным образом содеяшася. В том же Вышеграде тогда господствуя благоверный и христолубивыи князь Андрей, сын сего Георгия Долгорукаго. Он дуже сей Андрей преселися господствовати в богоспасаемый град Владимир. С ним же принесен бысть и той многочудесный пречистая Богородицы образ во Владимир. И от того времене киевьстии велицыи князи начата подручни быти владимирским самодержцем. Во граде бо Владимире тогда всея России начальство утверьжашеся пришествием чудотворнаго образа Богоматере. С ним же великий князь Андрей Боголюбский прииде и
л. 12    державство начальное во Владимере // восприят. По смерти же великаго князя Андрея Боголюбскаго нача во Владимире господствовати брат его великий князь Всеволод, во святом крещении нареченны Дмитрий, Георгиевич с боголюбивою своею княгинею Мариею, яже бяше дщи Щварнова князя чешскаго.
От сея блаженныя и богосочетанныя двоицы и родися сей благочестивый князь святый Георгий, о нем же нам слову вина предлежит, обаче не первый, но вторый сын их сей святый Георгий. Бяше первый бо сын родися им князь Костянътин. Иже и воспитани быша родительми своими во всяком благочестии и наказании и Священному Писанию наказани быша прилежно. Егда же блаженный сей Георгий в возраст прииде, сочетаи бысть законному браку, поят убо в жену сестру
л. 12 об. великаго князя // Михаила Черниговскаго. И бяше всеми обычаи благими украшен, паче же всего любяше прочитание божественных Писаний со вниманием и с великим прилежанием. И от всего зачатся в нем страх Божий и породи по пророку дух спасения, им же стяжа добрыя детели: умиление, смертную память, тихость, кротость, благоутробие, сострадание, смиреномудрие, милость ко всем, непомятозлобие, лубовь, милостыню, к тому же беззлобие крайнее. Не воздая бо зла за зло никому же, но всех согрешающих к нему прощаше и никого же оскорбляше, но всех умудряше духовными беседами и всех упокоеваше душевне и телесне. Вся, еже глаголаша и деяше, по божественным законом творяше. Ко святым же божиим церквам зело бяше рачителен и велие прилежание имяше и потребами всякими удовляше.
л. 13    Нищия же // и клосныя и разслабленныя сам своими руками омываше и странныя и безпокровныя непрестанно приимая и всех доволно навещаше и напояше и милостыню всем неоскудно подаваше, поминая пророческое речение сие: «Блажен разумеваяй на нища, и у Бога в ден лут избавил его Господь. Господь сохранит его и живит его и ублажит его на земли и не предаст его в руце врагов его». И премудраго Соломона словеса: «Милостынею и верою очищаются греси». И пророка Даниила и Навуходоносору глаголание: «Хрехи твоя милостынею очисти и неправды твоя щедротами ко убогим. Яко же бо огнь хврастие и сено пожигает, тако милостиня грехи потребляет». И таковым благочестием и добрыми делы цветый, бяше во граде Владимире живыи, приснаго благословения отца своего благовернаго князя Всеволода насыщался. //
л. 13 об.          Егда же отец его благоверный великий князь Всеволод, господствуя в преименитом граде Владимире, уразуме свое к Богу отшествие и восхот владимирское скипетродержание вручити, яко в России первоначалное, первому сыну своему Костянтину, в Ростов ему тогда по новогородском самодержавии господствующу. Ростов же хотяше предати сему блаженному Георгию. И тогда двократы посылаше в Ростов по сына своего Костянтина, яко да пришед отчее его благословение вкупе и начальство владимирское приимет. Всепагубный же враг, иже искони ненавидяй добра роду человеческому, вложи христолюбивому Костянтину в мысль, еже не ити во Владимир ко1 отцу своему Всеволоду, аще не обещаетъся обе области ему поручити с Ростовом и владимир-
л. 14    скую. // Благосердый же и христолюбивый Всеволод, видя ожесточение сына своего Костянтина, яко не восхоте приити к нему и прияти от него благословение и державу славнаго града Владимиря, сжалился о сем и, призвав втораго сына своего сего блаженнаго и христолюбиваго князя Георгия, благослови его и наследника его сотвори и власьтеля всей державе своей. И славный и преименитый град Владимир поручи ему, и не токмо державу владимирскую, но и прочая чада своя. Бяше бо ему всех сынов осмъ, их же имена: Костянтин, Юрий, Борис, Ярославль, Владимир, Светослав, Иоанн, Василий. Тогда во граде Ростове за таковое преслушание к родителю2 от державнаго Костянтина бысть казнь от Бога не мала: град бо и церкъви святыя погореша, толика яко
л.14 об. мала часть // града избысть от огня. И тако самодержавный великий князь Всеволод Георгиевич, нареченный во святом крещении Дмитрий, сына своего великаго князя Георгия лубезне благословив и всю державу свою и прочыя сыны своя предав на волю Божию и о всем благодарствуя Бога и пречистую Богородицу, преставися в вечный покой в лето 6720 месяца апрелия в 15 день в неделю в начало святыя литургии. Bcex лет жития его бысть 58, а по смерти супружницы своея многодобродетельныя великия къягини Марии, во ыноческом чине нареченная Марфы, поживе шесть лет и единнадесять месяц. И положен бысть во граде Владимире в соборней апостолстей церкви Успения пресвятыя владычицы нашея Богородицы и приснодевы Марии.
Приимшу же хоругви богоспасаемаго владимиръскаго самодержавия великому князю Георгию по отце своем Всеволоде. И егда нача господ-
л. 15    ствовати, тогда вражда // возрасте на него от брата его предреченнаго Костянтина Всеволодича. Той бо Костянтин аще и попремногу бяше благочестив и христолюбив, обаче в страсть завидения впаде, зане владимирское господоначалие не ему первому сущу в братех, но второму по нем сему Георгию от родителя их предадеся. И в первое лето по преставлении отца своего благочестиваго Всеволода, собрав воинство немалое, поиде из Ростова на брата своего Георгия Владимирскаго. Тако же и Георгий противу его с своима ратных людей полкам изыде. И снидошася обоих воинства с князи своими на реце Чехде, и бысть брань между ими немала, обаче великий князь Георьгий смиренная мудростъвуя и неходя видети хрестиянския крове властолюбия ради проливаемыя, пресече брань тую лубовию и кровопро-
л. 15 об. лития // устави покорением. Видя бе брата своего Костянтина единаче брани хощет, а не мира, абие сам святый сей князь Георгий вражду разрушает и примиряется брату своему князю Костянтиню, яко менший большему, и предает державу владимирскую Костянтину со многою лубовию, яко да господствует по изволению своему обще с ростовскою. Сам же благоверный великий князь Георгий нача господствовати во иных великих градех на Городце и в Суждали, и оттоле благодатию Христа Бога и милостию пресвятыя Богородицы в велицей любви пребыша оба брата Костянтин же и Георгий. Державъствующу же великому князу Костянтину в богохранимом граде Владимире и многая блага сотворшу монастыремъ же и церквам и всем людем духовнаго чина и мирскаго. К брату же своему великому князю Георгию
л. 16    велию любовь и согласие во всем // стяжа и мирно и богоугодно поживе, милосердие всякому человеку показуя и милостину нищим непрестанной творя. Пребысть же во Владимире на княжении мнее двую лету и нача болезновати. И виде себе изнемогающа и призва сыны своя Василка и Всеволода и вся велможи своя и бояры и прочия чиновники. И много поучив их от божественных Писаний о християнском житии и милостынни и о правосудии и о смерти и о суде и о воздаянии от Бога праведным и грешным, комуждо по делом его. И конечное слово рече к боляром своим: «Се убо мене видите изнемогающа и к концу жития моего приближающегося, чада же мои млади оставляются. Их же поручаю Господу Богу наше-
л. 16 об. му Иисусу Христу и преблагословенней // и пречистей его Матери владычице нашей Богородице и приснодеве Марии и потом брату моему и господину великому князю Георгию Всеволодовичу, той да будет им вместо мене отец. Вы же, о господие и мои князи и боляре и велможи, не забудите сих чад моих!» И обращся благочестивый князь Костянтин к чадам своим, рече: «О вы же, возлюбленная чада мои, имейте веру и любовь ко Христу Богу нашему и ко пречистей его Богоматери. И страхом Божиим непрестанно ограждайтеся и святыя его заповеди храните и святых церквей не отлучайтеся. Брата же моего, вашего же стрыя, великаго князя Георгия во всем слушайте и наказаю его повинуйтеся. Святители же Христовы и весъ священнический чин и иноче-
л. 17    ски чтите // и лубите. И поучению святых Писаний внимайте, и поведенная ими творите. Между же собою в мире и любви живите и со всеми мир и любовь имейте и ничто же чужих желайте, ниже чуждаго предела похитити похощете, но доволны будите данным вам наследием. И от своих праведных и чистых стяжаний приносите дары Богу. Убогия милуйте, нищия милостинею удовляйте, странныя призирайте, нагия одевайте, бедным помогайте и вся во славу Божию творите». И сия благочестивый великий князь Костянтин изрек, абие восстав, молитву сотвори пред образом Божим и пречистая Богородицы и оба сына своя объем и целова и благослови их, даровав им в наследие Василку Ростов, Всеволо-
л.17 об. ду же // Ярославль. И отпусти их коегождо во участие свое.
По сих же не многое время в житии сем пребысть и с миром преставися к Богу в вечную жизнъ в лето 6722 месяца февруария во 2 денъ в пяток в 6 час днем и положен бысть в соборной церквии пречистыя Богородицы честнаго и славнаго ея Успения во граде Владимире, идеже отец его Всеволод положен бяше. Дивно же дело сотвори тогда и супружница его великая княгиня Агафия. По погребении его не изыде из церкве, дондеже ту над гробом его и пострижеся во иноческий чин, и абие по пострижении отыде в Ростов и тамо добродетельно поживе. В третие же лето по супрузе своем преставися к Богу месяца ианнуария в 24 день.
По преставлении же великаго князя Костянти-
л. 18    на Всеволодича паки приял владимирскую // державу брат его сей святый великий князя Георгий, иже и прежде отец его вручи ему. И нача господствовати праведно и богоугодно, благочестием и верою и милосердием и милостынею попремногу сияя. Любяше же велми священнический и иноческий чин и нищих непрестанно милуя, и боляром же своим и ко всему народу аки отец чадолубивый бяше и много благодеяния повсуду в державе своей творяше. Во граде же Суждали соборную церковь пресвятая владычицы нашея Богородицы и приснодевы Марии созда каменную изрядне и прекрасне в лето 6729. Потом обрете на реце Волге при юстии реки Оки место прекрасно и высотою гор удобренно и ту созда град и нарече его Нижний Новъград. И в нем воздвиже монастырь изрядныя во имя Успения пресвятая Богородицы и иныя божественныя храмы созда. Некогда же посещающу ему племянники своя, князя //
л. 18 об. Костянтина дети, и в Ростов Василка, в Ярославле же Всеволода, и восхоте святый во Владимир путешествовати из Ярославля водным путем.
Пловущу же ему в судах великою рекою Волгою с боляры своими и с воинством, якоже обычаи великим государем. И доплывшу ему реки Унжи, яже течет в Волгу от Ярославля, вниз реки Волги разстоянием сто и осмъдесят поприщ, и ста на брезе при устии тоя реки Унжи и повеле шатры своя на брезе поставити. И в то время наиде на него сон, и абие возлеже, и бысть ему в тонце сне видение сицевое. Якобы на друзей стране Волги реки вниз на высоцей горе посреде лесу стоит икона тезоименнаго ему святаго и славнаго великомученика Георгия Победоносца, а пред нею стоит свеща неугасимая. Воспрянув же великий князь от сна и скоро поиде по брегу вниз по Волги. И прииде к заводи, яже ныне зовется его бы-
л. 19    тия // ради Юрьева, и оттоле смотрити начат прилежно3 на другую страну Волги на горы, яко не истина ли есть, еже ему во стне видено бысть. И от многаго желания, возбуженнаго в нем от Божия благоволения, моляше Христа Бога и пречистую Богородицу и тезоименнаго своего заступника святаго страстотерпца Георьгия, прилежно и из глубины сердца своего воздыхаше, дабы приобрести ему виденное истинно. Ходящу же ему на устия тоя заводи и на он пол Волги на горы, с прилежанием смотрящу. И се внезапу узре на горах тех огненную лучю, аки звезду сияющую сквозе лесу. И абие призва от ситклита своего болярина именем Василия, по реклу Скороумнаго. И указа ему перстом на горах тех в лесе огнь светящся, аки звезду или лучу некую сияющу, и сказа ему все по ряду, како виде то во сне икону тезоименнаго своего заступника страстотерпца
л. 19 об. Христова // Георгия. Болярин же той исполнен быв веселия о видении и о словесех благочестиваго князя, на лучу же зря огненную, паче радовашеся душею, благодаря Бога. И повеле великий князъ Георгий легкия суды водныя уготовити. В них же вскоре приеха с болярином своим Василием и со иными немногими на другую страну Волги. И взыдоша на брег и поидоша на гору ту лесную, не обретше ни малыя стези, пусто бо бяше место то. И не пощаде великий князь лица своего, ветими древес ударяемаго, ниже светлых и драгих ризь, своих раздираемых от сгущения леснаго, но с радостию течаше видети желаемое. И егда взыдоша на высокую ту гору, доиде князь до того места, идеже ему в явлении видеся, и ту обрете древо стоящя велие многолиственное, зовомое вяз, при корени же того древа на ветвех стоящу икону святаго и славнаго великомученика Победоносца и чудотворца Георгия, писанную
л.20     же // на дщее шаровными начертании, пред нею же и свещу горящу неугасимо. И падше, вси поклонишася страхом и радостию одержими, недоумеюще, како икона та обретеся, и кто принесе ю и свещу пред нею возже. Икона и свеща та не угасает, понеже самое пустое бяше мъсто и от градов и сел удалено и великия леса имуща. И дивившися зело о преславном том чудеси, прославиша Бога и угодника его и страстотерпца святаго Георгия. Святый же и благочестивый князь Георгий от великия радостии слезы от очию своею струи испущаше. И пребыстъ на том месте три дни и три нощи, моляся пред чудотворною иконою великому Христову страстотерпцу Георгию. На горе же той повеле лес посещи и место чистити. И устроиша повелением его на том месте
л. 20 об. вскоре // храм древянный во имя святаго великомученика Георгия, и жителей неколико близ храма того поселишася. И повеле великий князъ на той горе создати во свое имя град на славу и память чудесем святаго страстотерпца Георгия, вкупе же и своего бытия.
И от того времене прозвася та гора именем великаго князя Юрьевъская. Такожде и новосозданный той град наречен быстъ его же именем Юрьев с приложенным названием Поволский, того ради, яко в велицей России кроме сего новаго Юрьева еще два града именем сим суть, с прозваниями же различия ради первый Юрьев прозванием Ливонской, созданный великим князем Ярославом, во святом крещении нареченным Георгием, сыном святаго и равноапостальнаго князя
л. 21    Владимира, // хрестившаго Российскую землю, вторый же Юрьев Полской, созданный великим князем Георгием Долгоруким, сыном великаго князя Владимира Манамаха. Сей же третий4 Юрьев Поволский, зане при самой велицей реце Волге. Юрьем же вси тии трие велицыи князи нарицахуся просторечием, вместо имене Георгия.
И тако благодатию Божиею и предстателством пречистыя Богородицы и призрением преславнаго мученика Георгия, повелением же великаго князя Георгия Всеволодича град той новый Юрьев Повольский не во многа лета церквами святыми и монастыри и жителми, такожде и окрестными селами и волостами доволно умножися и распространися. Церковь же по прежную на горе на чудотворном месте во имя святаго великомученика Георгия граде Юрьеву и предвлом его первою
л. 21 об. нарекоша, сиречь // соборную, в ней же протопресвитера и прочий причет устроиша. И сия убо о создании градов Нижнаго Нова Града и Юрьева повествовахом, по сем же паки о житии святаго и благочестиваго князя Георгия глаголати возвратимся.
Хощу же рещи и повесть плачевную о содеявших во время господствования его, яже и самех безсловесных может подвигнути на плач, о в та убо времена и лета, в ня же аки пресветлому и великому светилу сияющу благочестием и верою, на престола царском седящу на великом Российском княжении сему святому и великому князю Георгию в преславном граде Владимире, иже яко крин цветяше в добродетелех християнских день и нощь, преспевая в законах Господних и житием правым присноцветущу, ему наста время луто. За
л. 22    грехи наша Богу наказующу нас, таковое // время прииде на ны, еже серп гнева Божия нарещи, и достоит пожинаяй и искореняяй вся нещадно, или меч, иже не точию обезчадствовати могии, но с чады и родивших посещали немилостивно, или чаша в руце Господни вина милости Божии не растворена гневом ярости, исполнь разстворения5 милость свою, глаголю, со гневом наказания смеси Господь за премногия грехи наша, хотящу Богу упоити нас вином ярости и уклонити от сея, в сию сиречъ преложити от милости в наказание и от наказания в милостъ. Тако время оно именовати, понеже по премногом милостивном наказании Божии не хощем престати от скверных дел наших, тем и Бог наказует ны овогда гладом, овогда мором, овогда же иноплеменных нашествие. Сими всеми пресечение творя нам от злых наших.
л. 22 об. Прежде же прояви // Господь Бог хотящий гнев свой быти на Росийскую землу грех ради наших многими знаменми небесными. В самый бо празник в Благовещение пресвятая Богородицы в пол утра явися над солнцем месяц мал и наполнися вскоре, и недоста же наполнения своего яко трех дней, абие наиде на него облак черн, постояв же на нем мало и сступи. И каки бысть мал месяц, и нача наполнятися вскоре, и паки наступи той же черный облак. Сице же бысть четверицею. Предваряше же тогда в Руси и глад велий всеми же сими знаменми и скорбьми всеблагий Бог, хотя нас свободити от работы греховныя. Мы же отнуд не исправихомься. О потом же попусти на ны приити языком незнаемым безбожным моавитяном, рекомы татаром, их же добре и ясно никто
л. 23    же весть, кто суть и откуду // приидоша, и что язык их и вера. Нецыи же зовут их тоумены, а друзии печенезии. Инии же глаголут, яко сии суть, о них же свидетельствует Писание Мефодия епископа Патарскаго, иже вышли сутъ из с пустини от тирияския, сущия между востока и севера, уду же изгна их Гедеон. Явитися же им и к скончанию времене, и попленят всю землю от востока до Ефрата и от Тиграда до Понтийскаго моря, кроме Ефиопии. О них же слышахом, яко многая страны плениша: ясы обесы и касогии, и приидоша на землю половецкую, и много половцев избиша, прочии же бежаша до реки Днепра, инии же по Дону разгнани быша в Лукоморие, и тамо изомроша, убиены гневом Божиим и пречис-
л. 23 об. тые его Богоматере, понеже // сии половцы много зла содеяша Российстей земли, егоже ради, мстя, всемилостивый Бог наведе, хотя погубите безбожныя сыны измаителскиа куманы, отмщая кровь хрестиянскую. Князи же половецкия именем Костянтин и с прочими князми прибежа на Русь к зяту своему князю Мстиславу Мстиславичу, тесту великаго князя Ярослава Всеволодича, и ко всем российским князем со многими дары и со многим молением, помощи прося. Мстислав же Мстиславич Галический и Мстислав Романович6 Киевский и Михаил Черниговский и инии младыи князи Божиим попущением идоша на помощь половцем за Днепр реку, и ниже изыдоша Днепром в море и паки внидоша в ту же реку Днепр и
л. 24    возведоша // пороги и сташа у реки Хортицы на броде. И вкупе русъ и половцы доидоиша татар и побиваху их крепко осм дней и гоняще их за реку Калку, преидоша и сами за нимы. И тамо грех ради наших быстъ сеча зла и победа губителна на князи русския месяца иуния в 16 день, какова же бысть от начала Российския земли, идеже некто знаменит в храбрости Александр Попович убиен бысть, с ним же и инех седмдесят храбрых. Глаголаху же, яко единех князей российских погибе тогда тысяща, кроме Мстислава Галическаго и Михаила Черниговскаго и Владимира Рюриковича Киевскаго. Сии токмо спасошася бегством. Таковую злобу попусти на ны Бог и недоумение в
л. 24 об. нас вложи за грехи наши, // ожидая покаяния нашего. Возвратишася же татарове вспять от реки Днепра на восток и землю тамошную повоеваша. Сих же злых татар таумен никто же весть, откуду приидоша и паки камо ся дели. Всего же российскаго воинства токмо десятая часть приидоша во своя.
Великий же князь Георгий Всеволодич не быстъ на брани той, Богом соблуден, но во своей деръжаве во Владимире пребываше. Во дни же княжения его некий християнин именем Аврамий пострада за веру Христову на низу от безбожных болгар и, мечем во главу усечен быв, взыде ко Христу месяца апрелия в 1 день. Лету же единому по страдании его преходящу, повелением благочестиваго сего самодержца пренесены быша мощи его в славный град Владимир и положены
л. 25    быша // в девическом монастыре в церкви пресвятыя Богородицы.
Во времена же она за умножение хрехов наших паки прояви Бог хотящий быти праведный гнев его на нас страшними небесными знамении, о них же зде вмале речеся. По прежде бывших убо чудесех знамених месяца маия в 3 день во граде Владимире, такожде и в Киеве и в Переславле во время самыя Божественныя литургии потрясяся земля, и святыя церкви разседошася, сущу тогда во граде Владимире самому великому князю Георгию. Тогда и Печерскаго монастиря тряпеза от труса разсядеся, и сущее в ней уготованное ястие и питие на обед падшее от крова камение сотре. Паки же скоро по сем во граде Киеве всем людем зрящым бысть солнце аки месяц. И явишася оба
л. 25 об. пола его и от них столпы сини и червлении, // и зелены, таже сниде огонь с небесе, яко облак велик на ручаи и Лыбеди. Людие же видевше сие, отчаяшася живота своего, и начаша друг ко другу прощение творити, мняще уже кончине быти, и с плачем горким возопиша ко Господу Богу и ко пречистей Богородице. И тако огонь тои бес пакости преиде весь град заступлением пресвятыя Богородицы. Во граде же Смоленске два лета бысть мор велик на люди. Великом же Новеграде бысть град крепок, от него же бяше многое умертвие человеком. Бог же премилосердый заступления ради пречистыя своея Матере, присно покрывающая молитвами своим Русскую землю, не хотя до конца погубити согрешающи люди, и своим Божественным промыслом подвиже из замория немецких людей. И приидоша с мукою и житом, и аще не бысть сице сотворил Христос Бог милостъ
л. 26    свою, // то при кончине бяху вси людие града того. Потом в пятое лето солнце погибе по всей земли. И паки по едином лете бысть знамение в солнце месяца августа в 3 день, тма прииде от запада в солнце7, от востока же светло оста солнце аки пяти дней люна, и паки тма прииде от востока такоже в солнце, от запада же светло бысть, и паки исполнися солнце, и бысть по обычаю.
Вся же сия страшная знамения быша при деръжаве благочестиваго сего самодержца великаго князя Георгия Всеволодича, яже вся сия и видя и слыша, умиляшеся душею и страхом колебашеся и сего ради присно в посте и молитвах и во всяких добродетелях и в сетовании плачевном пребывайте и многи милостыни нищим и милосердие
л. 26 об. ко всем человеком наипаче творяше. // Тако премилостивый Бог таковыми многосугубыми знаменьми устрашая нас, да быхом покаялися от злоб своих. Егда же не исправихомся и непотребный быхом, зависти и ненависти, гордости же и неправды не лишихомся, мнози бо и державнии наши князи аще и благочестиви бяху, но обаче друг пред другом честь и началство получити желаше, и един единаго от отеческаго жребия изгоняше и кииждо самочинне тщашеся самодержавство восхитити, и сам старейшинствовати хотяше Российским царствием, и брат на брата иноплеменныя языки поганых варъвар наводяху. И понеже самоволне не изволихом отвратитися от злоб сих, того ради и Бог усугубляше праведный свой гнев и попусти на ны тяжчайшыя напасти великое пленение. И зане же бичем от
л. 27    первыя // не наказахомся, сего ради пророческое слово на нас исполнися, яко же писано есть: «Упасеши я жезлом зелезным». И тако жестоким пленением Господь Бог в запустение предаде тогда многие грады и места Российскаго царствия. Наведе бо во время оно на Российскую землю мучителнейшаго варъвара, кровояднаго пса, злочестиваго ратника, безбожнаго царя Батыя, от восточный страны изшедшаго первее на Рязань, потом же на Коломну и на Москву. Та же и на преславный той самый град Владимир, в нем же благочестивы самодержец господствуя святый великий князь Георгий Всеволодич, и на иныя многия грады и на живущия в них християны, иже со многою злобою той нечестивый варьвар вся испровращая, якоже лютый и некий и злый и немилостивый зверь вся поядая, останки же //
л. 27 об. ноготми разтерзая и ногами попирая. Но кто может убо исповедати то время, нашедшее за грехи наша на российский народ, и излиянную на них чашу пелыни8 суда Божия? И кто может представити словом постигшая тогда хрестиянъский род сей? Убо нечестивый и безбожний царь Батый, яко молнии на стрела, со безчисленным множеством агарян безвестно прииде лесом, и вси сташа на окозе и взяша ю преком и послаша ко князем рязанским, просяще у них во всем десятое и в князех и в людех и во всяком скоте. Князы же рязанские Юрии Иневгорович да брат его князъ Олег, с ними же и муромский и пронскии князы, отвещаша: «Разве аще нас не будет, тогда наше отечество ваше будет!» Послаша же рязанский князи во Владимир к великому князу Георгию Все-
л. 28    володичу, да поидет с ними противу // безбожных агарян. Он же сам не поиде и воинства не посла, занеже страх нападе и трепет на всех, паче же гнев Божий простреся, и сего ради поглощена быстъ премудрость могущих ратная строити дела, ни един же от князей российских поиде друг другу на помощь, ниже совокупишася вси, еже противу безбожних ополчитися. Безбожнии же они варвары видяща9 время себе угодное, устремишася на Российскую землю и на коегождо отечество находяще, грады взимаху, князей же и людей мечу и огну предаваху. Рязанские же князи затворишася во граде и много ратовавше и крепко боронившеся и не возмогоша. Сквернии же агаряне град взяша месяца декамврия в 21 день и князя Юрия убиша и луди вся изсекоша, жены же и инокини и девы оскверниша перед всем народом,
л. 28 об. церкви же святыя и монастыри огню // предаша. Епископа же тогда не бяше ту. Потом же поидоша татарове к Коломне. Тогда великий и христолюбивый князь Георгий Всеволодич посла из Владимира сына своего Всеволода противу нечестивых да князя Романа Ингоровича да воеводу Иеремия Глебовича со всею силою. И сступишася у Коломны и бысть сеча зла. И одолеша безбожнии. Богу попустившу и убиша князя Романа и воеводу Иеремия, и многи ины избиша. Князь же Всеволод Георгиевич вмале дружине убежа во Владимир. Татарове же оттуду уклонишеся и, пришедше, взяша град Москву, в нем же господствуя князь Владимир, сын сего великаго князя Георгия. Тогда и тамо вся люди изсекоша и поплениша, а князя Владимира Георгиевича жива яша. Воеводу же Филиппа Нянку убиша. Князь же великий Геор-
л. 29    гий, сия вся слышав, зело опечалися и много // плакав. И целовав благочестивую свою сожителницу и чада и сродники, поиде за Волгу с племянниками своими с Василком и Всеволодом и Владимиром, еже воинство свое собрати, с ними же бы противу безбожних ополчитися. Во граде же Владимире остави сыны своя Всеволода и Мстислава. Отшедшу же великому князь, абие прииде нечестивый царь Батый и с ним безчисленное множество скверных агарян, и обступиша преславный той град Владимир во вторник прежде мясопустныя недели. Сынове же великого князя затворишася во граде Владимире, воевода же бе у них оставлен Петр Ослядюбукович. Татарове же приидоша ко Златым вратом и показаша им князя Владимира Георгиевича, его плениша в Москве. Братия же его князи Всеволод и Мстислав Георгиевичи с бояры своими стояху на Златых вратех и познаста брата своего Владимира, бяше бо уныл
л. 29 об. лицем // и зело бледь и изнемог весма бедою от нужди великия. И плакахуся горце, рыдающе зрящем на него и глаголаху к боярам своим: «О братия и друзи! Лючши нам есть умрети пред Златыми враты за дом пресвятыя владычицы нашея Богородицы и за православную християнскую непорочную веру, нежели в руце скверных сих предатися!» Петр же воевода рече еи тако: «Господне мои! Вседушно станем вси и не пощадим живота своего, аще и душы своя положим, зане сия вся наведе на ны Господъ Бог за грехи наша, якоже писано есть: „Нестъ человеку мудрости и несть мужества, ни думы противу Господеви"». Безбожни же агаряне станы своя урядивше у Златых врат и около всего града, и ту горцей
л. 30    смерти предаша благовернаго князя // Владимира Георгиевича, плененнаго на Москве. Всем из града зрящим и горко рыдающим. И тако тои первый от царственнаго дому святаго великаго князя Георгия Всеволодича поиде ко Господу Богу и мученическим венцем увязеся.
По убиении же его нечестивый Батый и множество скверных отлучившеся от станов своих, шедше и взяша град Суждаль и в нем соборную церковь пречистыя Богородицы и иныя церкви и манастири разграбиша, а прочее все огнем пожгоша и люди вси изсекоша и поплениша и поведоша плененныя с собою босых и безпокровных, издыхающих от мраза. И бе тогда видети трепет велий зело и страшен. Сведоша бо множество плена в станы своя злочестивыи и паки приидоша ко граду Владимирю. И в субботу мясопустную повеле скверный Батый воинству своему, и на-
л. 30 об. чаша лесы рядити // и пороки ставити, и оградиша тыном около всего града Владимира. Благочестивыи же князи Всеволод и Мстислав Георгиевичи и блаженный епископ Митрофан, видевше бываемое, разумеша, яко наутрие взят будет град их Владимир. Внидоша вси в соборную церковь пресвятая владычицы нашея Богородицы и приснодевы Марии честнаго и славнаго ея Успения. Вниде же ту и благочестивая и великая княгиня, супружница великаго князя Георгия, со дщерию своею и со снохами и со внучаты10, и начаша молитися Христу Богу и пречистей Богородице о избавлении грехов своих. И плач велий и рыдание горкое воздвигоша и друг со другом прощение сотвориша и постригошася вси во святый анггелский образ от епископа Митрофана и причастишася пречистых таин тела и крове Господа нашего Иисуса Христа, чающе от нечестивых скончатися за Христа мученическою смертию. В неделю же мясопустную по заутренний нечес-
л. 31    тивии татарове начаша // приступати велиим устремлением ко граду и одолевше, внидоша по примету во град. И тако взяша вскоре град Владимир до обеда и запалиша его огнем. Видеша же сие Всеволод и Мстислав Георгиевичи и вси людие, от ужести бежаша в средний град. И тако благочестивии тии князи Всеволод и Мстислав от безбожних убиены быша за Христа и прияша вечную жизнъ и с мученики святыми причтошася. Блаженный же епископ Митрофан и благоверная и христолюбивая великая княгиня, супружница великаго князя Георгия, со дщерию си и со снохами и со внучаты11 и прочии княгини и княжны и множество боляр и людей и благородных жен со дшерми затворишася в церкви пресвятыя Богородицы в палатах, уготовляшеся за Христову непорочную веру смертную чашу пити. Боголюбивый же и блаженный епископ Митрофан, поучив всех
л. 31 об. от божественнаго // Писания о надежде вечных благ и о еже не боятися от убиваущих тело и яко за Христа смерть несть смерть, но живот вечный и Царство Небесное. И став, помолися к Богу со слезами, сице глаголя: «Господи Боже сил светодавче, седяи на херувимех, научивый Иосифа сквернаго греха уклонитися и укрепивый Давида на Голиада и воздвигнувы Лазоря четверодневнаго из мертвых! Простри руку твою невидимую и приими с миром душыи сих рабов твоих, возлубивших тя всем сердцем и имя твое предпочитших паче временнаго живота, и сподоби их наследником быти Царствия твоего Небеснаго!» И паки вси причастишася святым и божественным таинам Христовым и прилежную молитву со многими слезами начаша творити ко Христу Богу, да приимет душы их с миром, и ко пречистей Богородице умильно моляхуся, да предстанет им в
л. 32    конечныя // и нужния исхода их час, егоже чают они в церкви ея святеи прияти. И уже последнее целование и прощение вси друг другу содворше, начаша ожидати нужныя себе от безбожних смерти, молящеся непрестанно Богу. Скверныи же татарове разсекоша двери у соборныя церкви и лесу множество в церковь вовлекоша и около церкви наволочиша, и тако без милости окаянныи запалиша огнем. Огну же велми возгоревшуся и дыму умножившуся, и от того великаго зноя боголюбивый епископ и великая и христолюбивая княгиня и чада ея и вси сущии ту людие издохошася, еще молитву сущеи во yстеx их, инии же во огни сгореша, а инех оружием сквернии смерти предаша. И тако вси приснопамятнии тии и блажении новии Христови страстотерпцы блаженную кончину мученическую прияша, предавше души своя в руце Господеви и к мученическим ликом причтошася. //
л. 32 об.          И оттоле поиде злочестивый и скверный Батый на иныя многия грады российския со многою злобою, его же лютостию храбрейших российских сынов безчисленное множество меч пояде, инии же плещи даша сопротивным. Скипетродержатели же ови убо оружием падоша, ови же уклоньшеся в чужих господарствах гостяху, всякия помощи отпавше. Лютый же той ратник грады разоряяй и гражданы овых в плен поплени, овыя же оружию яд полагаше, корысть же многу стяжа, княжская имения приобрете. Велие зло от него сотворися множеству российскаго языка християнскому народу. Матери обезчадствовахуся, и сосцы млечных источников лишаишася. Вместо же тех слезныя сьтруя от очию извождахуся, видяща младенцы своя на земли повержены и мягкая их удеся конскими ногами стираемы. И кто может словом сказати болезни их утробныя и
л. 33    иныя неизчетныя напасти! Чертожницы // повлачими бываху и всуду обводими, девы растлеваемы, сигилитския жены, яже никогда же руками своими работному делу касахуся, но рабом своим повелеваху прежде, последи же сами повелеваеми варварскими женами, работному игу выю преклоняюще, предъстояху жерновам и к горнцу руце простирающе, огнь возжигающе и с черпалом рыщуще, источники обходяще и воду ношаху, трапез предстояще по гнестеи и храмины пометающе. Яже прежде быша горди и потом же работою склачени смиришася, иногда златыми монисты и свиляными одеждами украшахуся, потом же в рубищная раздранная одеяния оболченя. Боси же и алчнии хождаху священныя девы, нудими бываху и обругаеми, мужие от жен разлучаемы, чада родителеи лишаеми, юноши в плен ведомыи, средовечнии и старцы мечи пронзае-ми, храбрыя князи оружием падаху, священницы в жертвенницех закалаеми. Земля Российская
л. 33 об. очервленися, кровь бо реками // лияшеся от телес, воды смешаеми бяху с кровию. Умилен позор бяше и странно видение. Мужие бо яко снопие в день жатвы повержены лежаху, телеса раздробленная смесишася священных мужеи и девиц, и не бе кто погребаяй их, врановом же и псом пища. Паче предлежаше воплеве во градех и рыдания в селех, хлипания на улицах, плачеве в домех, повсюду стенание, страх и на распутиях. Вси тогда ужасошася, вси изнемогоша, вси жизни сея отчаяшася, ниже бегством свое спасение можаше къто умыслити, вси печалми истаявше, яко сетию полячены всюду. Беды таковыи, ихже ни слово может представити, тогда же мнози и мученическими венцы от Бога увязошася, пострадавше за Христа. Яве же естъ видети, яко сию злобу от Батыя попусти на ны Господь грех ради наших,
л. 34    иже и протече землю Российскую даже // и до великаго Новаграда. Тамо же внити ему, якоже мнози глаголют, божественная сила возбрани, идеже тогда самодержавствую богохранимый великий князь Ярослав Всеволодич, егоже тамо тогда снабдевая, соблюде Господь Бог наследника быти российскому царствию. С ним же беху тогда и шесть благоверных сынов его: Александр, Андрей, Костантин, Афанаси, Данил, Михаил. И от сих убо до зде.
Возвратимъся же паки о блаженном князе Георгие повествовати. Великий убо сей и приснопамятны князь Георгий Всеволодич, собрав воинство свое, стояше с полки своими близ реки Волги на реце Сите. И ту приидоша к нему вестницы, якоже древле к праведному Иову, поведающе емю, яко преимениты твои град Владимир татарове взяша, епископ же Митрофан и великая твоя
л. 34 об. княгина со дщерию и со снохами // и со внучаты12 и прочия княгини и множество бояр и людей в соборней пресвятыя Богородицы церкве огнем сконъчашася. Мнози же от них в то время святый иноческий образ восприяша от епископа. Сына же твоего Владимира во граде Москве погании взяша и по многом истомлении у града Владимира показавше, его смерти предаша. Воевода же Филипп на Москве за веру Христову мучением от них же скончася. Два же старейшая сына твоя Всеволод и Мстислав в Новом граде Владимире от тех же поганых татар убиени быша. Такожде и иных людей державы твоея множество безчисленное избиено бысть, оставши же людие к тебе грядут. Блаженны же самодержец и прочия с ним, слышавше сия, воскричаша с плачем велиим, рыдающе о церковном зазорении, о епископе же и о великой княгине и о многом кровопролитии християнском. И от милостивныя и сострадателны душии своея великий князь восхлипая из глу-
л. 35    бины // сердца, моляся ко Господу и, вопия сице, глаголя: «О владыко Господи Боже Вседержителу! Сице ли угодно твоему человеколюбию, яко врази наши многыя грады християнския разориша и попраша многия церковныя домы святыни твоея, и множеству людей твоих таковую злую пагубу содеяша? И аз, раб твой, лишен бых не токмо супружницы моея и чад, но и множества тобою дарованныя ми державы, и не вем, что сотворити, понеже без числа согрешихом, и ты, преблагий владыко, прогневался еси на нас и зело смирил ны еси! Яко праведен еси Господи и праведным судом твоим многопролитием неповинныя крове рабов твоих многия ныне новыя мученики к себе привел еси, и почто аз един остах смирен и посрамлен? Но, о премилостивыя Господи, Господи, милости твоя не отстави от нас, и мене грешнаго и недостойнаго раба твоего сподоби пострадати со христоименитыми сими людми
л. 35 об. твоими истинныя ради и непорочныя // веры християнския и имени ради твоего святаго Отца и Сына и Святаго Духа, и за дом пречистыя владычицы нашея Богородицы и приснодевы Марии, и причти мя наследию вечных твоих благ с новыми сими твоими мученики, и о всех сих да будет воля твоя святая, яко благословен еси во веки! Аминь».
И тако святому и блаженному самодержцу великому князю Георгию в велице печали молящуся со многими слезами, и помалу нача укреплятися и всу печаль свою вотверже на Бога и на пречистую Богородицу и одним гласом утешаяся. Якоже годе Господиви бысть, тако и бысть буди имя Господне благословенно во веки. И абие со всеми полки своими уготовися к супостатом на брань, еже за православную веру и за християн крепко стояти. Поганый же царь Баты и все его нечестивое воинъство скоро приближашися. И егда сступишася русстии вои с безбожными срацыны
л. 36    и бысть // брань велика зело и сеча зла и кровь многа, яко вода пролияся. Богу же попустившу, побежденыи быша российстии князи и боляре и все воинство от поганых татар, идвже святый и благочестивый российский самодержец великий князъ Георгий пострада за Христа и за православную христианскую непорочную веру, убиен бысть от нечестиваго Батыя и венчася кровию, ею же взыде ко Христу Богу нашему, от него же и мученический венец прият, его же желаше, в лето от бытия мира 6746 месяца февруария в 4 день. И повержено бысть святое тело его ту на поли не брегомо.
Егда же погании татарове инамо уклонишася, тогда блаженный Кирилл епископ Ростовский, идый з Бела езера, и прииде на место, идеже доброповедный Христов мученик великий князь Георгий Всеволодич святую свою кровь пролия от
л. 36 об. безбожных татар, подвизаяся по отеческом // достоянии. И ту обрете блаженный Кирилл честное тело его, еже со многими слезами благоговенно и взем, принесе во град Ростов и пев над ним надгробныя пения со всем освященным собором и с протчим причтом. Плачю же и воплю велику бывшу от всего христоименитаго народа. И положиша и честно в церкви пречистыя Богородицы в Ростове. Главы же его тогда не обрете епископ во множестве трупия мертвых13. Последи же нецыи от благочестивых обретоша и святую главу его, и принесоша в Ростов и положиша ю в гробе к честному телеси его, яже Божиим благоволением абие прилпе к телеси его, яко всем удивитися и Бога прославити, прославляющаго угодника своего.
По сем же времени убо малу мимошедшу по убиении святаго и благочестиваго князя Георгия и по взятии великаго и столнаго града Владимира
л. 37    со всеми его // благими узорочии и по отшествии во своя богомерскаго и злочестиваго царя Батыя, прииде из Новаграда великий князь Ярослав Всеволодич, брат сего святаго Георгия, и прият престол великаго княжения в преименитом граде Владимире, его же от трупия мертвых очисти и церкви святыя очистив обнови, оставшиеся же люди собрав, любезне утеши. Егда же ему из Новаграда пришедшу, виде столъния и славный свой град Владимир погаными весь разорен и огнем попалон, и хитрая его здания и церквии святыя разрушены, и вся красота его погублена, брата же своего, великаго князя Георгия Всеволодича, убиена, и архиереа и весь освященный собор и множество князей и боляр и прочих благородных людей российских горцей смерти преданных. И восплакася великий князъ Ярослав в
л. 37 об. горести сердца своего и воздев руце свои // на небо и рече: «Господи Вседержителю и творче всея твари видимыя же и невидимыя! Сице ли угодно твоему человеколюбию, да сие стадо твое, Христе, еже искупил еси ценою крове своея бо-жественныя, предал еси кровопияцем и сыроядцем поганым человеком, звериный нрав имущим, паче же рещи врагом твоим, не знаущим тебе, истиннаго Бога нашего Иисуса Христа, и страха твоего никогда не имущим? И ныне поработихомъся раби твои богомерскому цару, неправедну и лукавнейшу, паче всей земли и град сей предан бысть, якоже древе и Иерусалим Навуходоносору царю Вавилонскому, и есмы смирени ныне паче всех языков грех ради наших. Увы мне, Господи! Священники твоя заклаша, имъ же не бе достоин весь мир, и олтари твоя раскопаша и святыя твоя вся в попрание бысть скверным ногам их, и вси
л. 38    люди твоя // острием меча поразиша, и раба твоего благочестиваго князя Георгия за имя твое святое убиша, и остах аз един. И ищут и мене поглотити. Но избави мя, Господи, от рук их ради пречистыя твоея Матере и непостыдныя к тебе ходатаицы о нас грешних! И упокой души рабов твоих, избиенных от безбожних агарян имене твое ради святаго, со всеми святыми в Царствии твоем и спаси мя, раба твоего, ими же веси и судбами, яко благии и человеколюбец! Аминь».
По молитве же благоверный и великий князь Ярослав повеле избиенных телеса предати всех земному погребению честне. Потом же посла из Владимира в Ростов благоговеинныя мужы от духовнаго и от ситклитскаго чина и повеле принести с великою честию во град Владимир чест-
л. 38 об. ное и святое и страстотерпческое тело // брата своего, святаго и великаго князя Георгия. Пришедшу же послании в Ростов и вземше святое тело его, со многою честию понесоша е. И егда быша близ преименитаго града Владимира, срете его сам великий князь Ярослав и боголюбивый епископ Кирилл со всем освященным собором и с боляры и со всенародным множеством граждан и окрестных со юмилением и слезами. И бысть тогда по блаженном сем самодержце и страстотерпце от всего народа плач велик зело, рыдание же и стенание. И положиша святое его тело во граде Владимире в соборне церкви Успения пресвятая владычицы нашея Богородицы и приснодевы Марии верху помоста со псалмы и пенъми надгробными. Всем же зрящим видети есть чудо преславно и удивлению достойно. Яко святая глава его тамо совокупно прилпе ко честному телеси
л. 39    его, яко ни следа // видети отсечение на шии его, но и вся составы целы и неразрушены, иже и доныне тако во граде пребывающе, храними верху земли от всех людей видими и удивляеми и достойно почитаеми, подают благодатию Божию различная исцеления всем притекющим с верою. Еще же и рука его десная выспрь бяше воздеяна, и видета ею же, яко живу показует подвиг своего совершения, яко восприят от Бога вместо земнаго царствия Небесное Царство и вечъных благ наслаждение вкупе с царственъною си супружницею и с треми благороднейшими сыны и с их княгинями и с единою си благородною дщерию. Самодержавствова же в преименитом граде Владимире по смерти брата своего Констянтина двадесят и пять лет. Празднует же церковъ Божия
л. 39 об. память его месяца февруараия в 4 день, // в онже и пострада за Христа и за християнъскую православную и непорочную веру и за християнския Российския земли народ.
Воспомянуты же зде подобает мало и о велицем князе Ярославе Всеволодиче, брате святаго и блаженнаго страстотерпца Георгия, и о подвизех его за православную веру и за християн и о кончине его, како и он душу свою положи за Христову веру и за люди земли своея. По пленения бо Руския земли от нечестиваго царя Батыя, належащим тогда поганым за премногия грехи наша и насилствующим христианству много, и того ради благочестивый сей и приснопамятный великий князь Ярослав поиде сам из Владимира града во Орьду во всепагубную и лютую землю бусорманскую, понеже тогда злоименитый Батый при-
л. 40    сла // к нему посланника своего, зовыи его к себе во Орду. Ходившу же ему и достойную честь прият от царя, и восприим старейшинство во всей Российсте земли, и прииде в землю свою во Владимир честно и славно. И якоже прежде своего хождения во Орду по блаженном брате своем Георгии, тако же и из Орды пришед, в преименитом граде Владимире и повсюду святыя церкви сътроя и гради обновляя и люди разбегшия собирая и многия пришелцы утеши и множество народа собра. И бысть по велицей скорби паки радость велия православным христяном. И вси благодарствоваху Бога и пречистую Богородицы, преспеваеще во благочестьи. Ненавидяй же добра враг диявол искони спону творяй человеческому роду, паки лютейшую брань воздвизает на Христово стадо, наостри поганыя татары творити христия-
л. 40 об. ном великое насилие // и безмерныя тягости, паче же того злейшим си коварством тщахуся окаяннии и веру християнскую в Российстей земли повредити и святыя церкви разорити, богомерския же прелести персидския волшебное служение хотяху в Руси предножити. Им же тогда возрази таковое презлое коварство и шатание святый исповедник Христов великий князь Михаил Черниговский с болярином своим единоревнителным Феодором, иже оба от тех же поганых за веру Христову мучением скончашася. Сей же великий князъ Ярослав, не терпя зрети людей земли своея погибаущих душею и телом, прииде второе во Орду к беззаконному цару Батыю. С ним же и братия его и племянники пришедше, не устидеся царския темныя власти, ни ужасеся безстудныя его ярости, но добре подвизяся о истинне глаго-
л. 41    лати // за благочестие и за люди Божия Руския земли, обличая поганых безумные веление. Безбожний же Батый посла его к Кановичем, и тамо многая зла пострада от безбожных татар и многое истомление прият за святыя церквии и за множество христоименитое достояние. И сия доблественно со благодарением претерпе и таковым своим страданием добрий сей подвижник сотвори многую ползю и велику помощь и ослабу христианъству от тяготы и от злаго насилства татарскаго. Поиде же оттуду вельми изнемогая и тогда воспомяну любезная своя чада Александра, Андрея, Констянтина, Ярослава, Даниила, и Михаила и двъ дщери Евдокию и Ульянию, их же любезне и со слезами, аки ту сущих, благослови. И послед-
л. 41 об. нее изнеможе болезнию от многаго // истомления и нужды, и со многим благодарением предаде праведную14 душу свою в pyце Божии в землии иноплеменных. «И что убо болши сея любве, — якоже святое Евангилие глаголет, — еже положити душу свою за други своя». Тако и се приснопамятный великий князь Ярослав в далней стране в Пнове Орде положи душу свою за святыя церкви и за веру християнскую и за вся люди земли Российския. И сего ради причте его Бог в лик святых избранных своих. Три же сыны его прежде его ко Господу отидоша: Феодор, Афанасий и Василий. Бяше бо у него всех девять сынов.
Лепо же есть зде мало воспомянути и о прочих братиях святаго великаго князя Георгия Всеволодича. Якоже бо воспомянухом в житии его о братиях его двоих о Констянтине и о Ярославле, //
л. 42    тако подобает и о прочих возвестити, занеже и тии благочестивии и богоугоднии быша. Первый убо бяше Констянтин, о немже доволно поведано бысть. Вторый по нем Борис, третий и четвертый Георгий и Ярослав, о них же тако же выше речено бысть. Пятый Владимир, иже на Москве господствуя и потом в Переславле, шестый Светослав, седмии Иоанн, осьмый Василий, иже на Костроме господьствуя, ту же и преставися. Иже якоже трие, тако и прочий пять бяху зело благочестви и милстиви во благочестивем убо исповедании християнских добродетелех, и тии скончашася и от Христа Бога прияша вечную жизнъ с праведными. Подобает же и сие ведати, яко на Костроме два Василия погребены суть. Первый Василий Всеволодичь, о нем же выше речеся, яко // на Костроме господствуя. Мню же сему быти и про-
л. 42 об. званием сим, иже наречеся бяше Квашня. При нем же явися икона пресвятыя владычицы нашея Богородицы и приснодевы Марии, рекомая Феодоровская. Другий же племянник его Василий Ярославич, о немже в российских летописцах пишет сице. По великом князе блаженном Александре Ярославиче Невском державствова во граде Владимире брат его, великий князь Ярослав Ярославич. Седмь лет по Ярославе же Ярославиче господствова пять лет во Владимире брат же его, великий князь Василий Ярославич, и с миром ко Господу отыде и положен бысть на Костроме у святаго Феодора. Последи же их бяше и ин великий князь Василий, сын великаго кънязя Александра Невскаго15, но тои по свидетельству летописцов при отце своем господствоваше в великом Новеграде, // а не на Костроме. О протчем же
л. 43    житии его и о скончании в летописаних не обретеся. И о сих убо до зде. Мы же сия писанию предахом в память последующим родом, да не забвены будут добродеяния и за Христову веру страдания святаго благовернаго великаго князя Георгия Всеволодича, такожде и сродников его благочестие ведомо будет, имиже Бог в Троице славимыи прославляшеся и ныне славится, дивен сыи во святых своих, емуже слава подобает, честь и поклонение16, великолепие ныне и присно и во веки веков. Аминь.
 
РГБ, ф. 218 (собр. отд. рукописей),
№ 768, л. 10 об–43
_______________________________________________________________________________
1 В ркп. но.
2 В ркп. родителюлю.
3 В ркп. приложно.
4 В ркп. трей.
5 В ркп. разсторения.
6 В ркп. Ромонович.
7 В ркп. лице.
8 Так в ркп., надо полыни?
9 В ркп. себе угодное время.
10 В ркп. мнучаты.
11 В ркп. мнучаты.
12 В ркп. мнучаты.
13 В ркп. далее обретоша.
14 В ркп. далее свою.
15 В ркп. евскаго.
16 В ркп. поконение.
 
 
 
 
размещено 19.08.2009

(1.4 печатных листов в этом тексте)
  • Размещено: 01.01.2000
  • Автор: pavel
  • Размер: 54.95 Kb
  • постоянный адрес:
  • © pavel
  • © Открытый текст (Нижегородское отделение Российского общества историков – архивистов)
    Копирование материала – только с разрешения редакции

Смотри также:
О.Ф. Козлов. К вопросу об определении предмета советской археографии (историографические заметки)
В.А. Черных. О предмете археографии и ее месте в кругу смежных научных дисциплин
Валк С. Н. Судьбы археографии
С.О. Шмидт. С. Н. Валк и развитие археографической культуры
И.В. Нестеров. Хорошо забытое новое
Д.А. Чугаев. О методике советской археографии
В.М. Загребин. О названии одной буквы древнего славянского алфавита
М.П. Илюшенко. К вопросу о функциях документов
Ю.А. Ахапкин. Организация ленинского архива
Д.А. Чугаев. О методике советской археографии
В.В. Фарсобин. Археография
Валк С. Н. Историко-революционная библиотека. Пг., 1920-21. [Рецензия]
И.В. Нестеров. Князь Пожарский –– психологический портрет по данным графологии
А.С. Усачев. Древнерусская книжность эпохи митрополита Макария: Книга степенная царского родословия
И.В. Нестеров. Непарадный портрет основателя Нижнего Новгорода
«Костромское житие» великого князя Юрия Всеволодовича
И.В. Нестеров. Китежский летописец: проблема авторства, источников и времени составления
И.А. Кирьянов. Как возникла легенда о граде Китеже?
И.В. Нестеров. Археография: Становление современного понимания термина (по материалам справочных изданий)

2004-2017 © Открытый текст, перепечатка материалов только с согласия редакции red@opentextnn.ru
Свидетельство о регистрации СМИ – Эл № 77-8581 от 04 февраля 2004 года (Министерство РФ по делам печати, телерадиовещания и средств массовых коммуникаций)
Rambler's Top100